Тәжікстан мен ЕҚДБ энергетикалық ынтымақтастықты және гидроэнергетиканы кеңейтпек

Тәжікстан мен Еуропалық қайта құру және даму банкі (ЕҚДБ) инфрақұрылымды дамытуға, электр энергиясының шығынын азайтуға және гидроэнергетикалық қуатты арттыруға баса назар аудара отырып, энергетика саласындағы ынтымақтастықты кеңейту мәселесін талқылады. Бұл туралы Қазинформ ақпарат агенттігі Ховарға сілтеме жасап хабарлады.

Мәселелер Тәжікстанның энергетика және су ресурстары министрі Далер Жұма мен ЕҚДБ-нің Тәжікстандағы резидент кеңсесінің басшысы Холгер Визель арасындағы кездесуде талқыланды. Министрліктің мәліметінше, екі тарап серіктестікті нығайту және негізгі инфрақұрылымдық жобаларды ілгерілету мүмкіндіктерін қарап, қазіргі ынтымақтастық деңгейіне риза екенін білдірді.

Электр энергиясының шығынын азайтуға және энергетикалық жүйенің жалпы тиімділігін арттыруға бағытталған бастамаларды қаржыландыруды тартуға ерекше назар аударылды. Талқылауда сондай-ақ ЕҚДБ қатысуымен гидроэнергетикалық қуатты қосымша дамыту мәселесі де қаралды.