Министр Ұралоғлу: Түркиясыз дәліз жоқ, жаңа логистикалық омыртқа құрып жатырмыз

Көлік және инфрақұрылым министрі Абдулқадір Ұралоғлу SETA ұйымы Анкара кеңсесінде өткізген «Өзгеріп жатқан жаһандық көлік геосаясаты және Даму жолы жобасы» конференциясында сөз сөйледі. Ол жаһандық сауда дәліздерінің қайта сызылып жатқанын және соңғы жылдардағы геосаяси оқиғалар көлік жүйелерінің қаншалықты осал болатынын көрсеткенін айтты. Ормуз бұғазының маңындағы шиеленіс пен Ресей-Украина соғысы елдерді қауіпсіз, қысқа, болжамды және тұрақты бағыттарды іздеуге итермелеп жатқанын атап өтті.

«Түркиясыз дәліз жоқ» деген Ұралоғлу Даму жолын Басра шығанағын Иракқа қарасты Фав порты арқылы бастап, Түркия арқылы Еуропаға жалғайтын жаңа логистикалық омыртқа ретінде сипаттады. Ол жобаның 45 күндік Үміт мүйісі бағытына қарағанда 20 күнге қысқарып, шамамен 25 күнге түсетінін айтты. Сонымен қатар Орта дәлізге қосылатын желілердің жалпы ұзындығы 2 мың 156 шақырымға жеткенін және жүзеге асырылған мен жоспарланған инвестициялардың қосындысы 47,1 млрд доллар екенін мәлімдеді.

Ұралоғлу Қарс-Ығдыр-Аралық-Дилучу темір жолының құрылысының басталғанын еске салды. Ол 28 шілдеде Президент Рәжеп Тайып Ердоған мен Ирак премьер-министрі Әли аз-Зәйди қатысуымен қол қойылған меморандумдардың жобаны нақты жүзеге асыруға бағытталғанын және оларды екі елдің парламенттерінен өткізгеннен кейін құрылысты бастауды жоспарлап отырғанын айтты.