Қазақстанға 1,3 трлн теңгелік активтер қайтарылды — Асылов

Қазақстанда 1,3 трлн теңгелік активтер қайтарылып, олардың есебінен 466 әлеуметтік нысанның құрылысы мен реконструкциясы қаржыландырылды. Бас прокурор Берік Асылов бұл туралы Президент Қасым-Жомарт Тоқаевқа баяндады, деп хабарлайды Ақорда.

Қаржыландырылған нысандардың 378-і аяқталған. Олардың арасында алты облыстағы ірі медициналық нысандар, Астанадағы Қ. Мұнайтпасов атындағы стадион, сондай-ақ Балқаш, Павлодар және Арқалық әуежайлары бар.

Асыловтың айтуынша, 2026 жылдың тоғыз айында қылмыстық құқық бұзушылықтар саны 14,6%-ға азайған; қоғамдық орындарда 22,3%-ға, көшелерде 20,1%-ға төмендеген. Халықаралық ынтымақтастық аясында Бас прокуратура 39 юрисдикциямен 92 шарт жасасқан; Қазақстанға 50 адам экстрадицияланған, шет мемлекеттерге 123 адам берілген.