Түркия, Катар, Пәкістан және Индонезия «Бадр» қорғаныс ынтымақтастығы туралы келісімге қол қойды

Түркия, Катар, Пәкістан және Индонезия әскери өндіріс пен қорғаныс өнеркәсібі саласындағы ынтымақтастық туралы «Бадр» Меморандумына қол қойды. TRT мәліметінше, құжат Катардың астанасы Доҳада қол қойылған.

Меморандум төрт ел арасындағы әскери өндірістегі ынтымақтастықты дамытуға, олардың әскери мүмкіндіктерін нығайтуға, сондай-ақ техникалық және әскери оқыту, ғылыми зерттеу және әзірлемелер бойынша бірлескен қызметті қолдауға бағытталған. Құжатқа Катардың Премьер-министрінің орынбасары және қорғаныс істері жөніндегі мемлекеттік министрі шейх Сауд бин Абдурахман бин Хасан әл-Тани, Индонезияның қорғаныс министрінің орынбасары Юсуф Жауһари, Пәкістанның қорғаныс министрі Хваджа Мухаммад Асиф және Түркияның Ұлттық қорғаныс министрі Ясар Гүлер қол қойды.

Келісім төрт елдің қорғаныс өнеркәсібі мүмкіндіктерін өзара пайдалануды жеңілдетуді және саладағы интеграцияны кеңейтуді көздейді, сондай-ақ қауіпсіздік пен тұрақтылықты қолдауға ықпал етуі күтілуде. Еске сала кетсек, 7 тамызда Түркия Президенті Рәджеп Тайып Ердоған, Пәкістан Премьер-министрі Мухаммад Шахбаз Шариф және Сауд Арабиясының Тәж мұрагері әрі Премьер-министрі Мухаммед бин Салман Меккеде бірлескен қорғаныс келісіміне қол қойған. Бұл құжат үш ел арасындағы әскери одақты көздейді.