Қазақстан мен Еуропалық Одақ арасындағы сауда айналымы 31,6 млрд долларға жетті

Брюссельде Қазақстан мен Еуропалық Одақ арасындағы Сауда жөніндегі ынтымақтастық комитетінің 9-шы отырысы өтті. Отырысқа ҚР Сауда және интеграция вице-министрі Ж. Кушукова және Еуропалық комиссияның Оңтүстік көршілер, Таяу Шығыс, Түркия, Ресей, Беларусь және Орталық Азия жөніндегі бөлімінің басшысы И. Ируаррисага тең төрағалық етті. Хабарды Egemen.kz таратты.

Талқылауда комитеттің 8-отырысының хаттамасын орындау, сауда-экономикалық және инвестициялық ынтымақтастықтың жағдайы, өзара саудадағы кедергілер мен шектеулерді жою мәселелері қаралды. Кеңейтілген әріптестік және ынтымақтастық туралы келісім аясындағы сауда мәселелері, санитариялық және фитосанитариялық мәселелер, техникалық реттеу мен стандарттау және Орталық Азиядағы Еуропалық Одақ қаржыландыратын сауда жобалары талқыланды. Тараптар отырысты достық әрі сындарлы деп атап өтті.

Еуропалық Одақ Қазақстанның сыртқы саудасындағы жетекші орындардың бірінде тұр. 2026 жылғы қаңтар–тамыз айларында тауар айналымы 31,6 млрд АҚШ долларын құрады, бұл 2025 жылдың сәйкес кезеңіндегі 29,2 млрд доллардан 8,2%-ға жоғары. Қазақстанның Еуропалық Одақ елдеріне экспорты 12,2%-ға өсіп, 25,3 млрд долларға жетті. Экспорттың негізгі тауарлары — мұнай және мұнай өнімдері, уран, көмір, табиғи газ.