Марк Карни Анкарада: Түркия мен Канада стратегиялық серіктестікке бет бұруда

Канада премьер-министрі Марк Карни Түркияға ресми сапармен келді. Анадолу агенттігінің хабарлауынша, Анкарадағы Президенттік кешенде Карниді Түркия президенті Режеп Тайып Ердоған ресми қарсы алу рәсімімен күтіп алды. Канада премьер-министрінің құрметіне 21 мылтық атылды.

Карни әлеуметтік желідегі парағында Анкараға келуін көрсететін кадрларды жариялап: «Біз серіктестігімізді жаңа деңгейге шығару үшін осындамыз», деді. Оның айтуынша, Канада түрік нарығына қолжетімділікті кеңейтуді көздейді. Ердоған бірлескен баспасөз конференциясында екі ел арасындағы қазіргі сауда көлемі шамамен 3 миллиард доллар екенін, оны алдымен 5, кейін 10 миллиард долларға жеткізуді жоспарлайтындарын айтты. Жаңартылған әуе көлігі туралы келісім арқылы екі ел арасындағы тікелей рейстер саны шамамен екі есеге артатыны атап өтілді.

Тараптар қарым-қатынасты стратегиялық серіктестік деңгейіне көтеруге шешім қабылдап, іс-қимыл жоспарын бекітті. Жоспар аясында жыл соңына дейін еркін сауда келісімі бойынша келіссөздерді бастау көзделген. Анкарадан кейін Канада премьер-министрінің Стамбулға баратыны күтілуде.