Армениядағы «Күшті Армения» партиясы мерзімінен бұрынғы сайлауға дайын екенін айтты

Бизнесмен әрі опозициялық саясаткер Самвел Карапетянның басқаруындағы «Күшті Армения» партиясы Армениядағы мерзімінен бұрынғы сайлауды өткізуге дайын екенін мәлімдеді. Партияның парламенттік фракциясының басшысы Нарек Карапетян премьер-министр Никол Пашиняннің мерзімінен бұрынғы сайлау туралы мәлімдемесіне әлеуметтік желіде жауап берді.

Нарек Карапетян «Біз дайынбыз. Тек күнін айтыңыз. Адамдар шексіз жеңілістерге қарсы дауыстарын көтеруі керек» деп жазды. Ол партия басшысы Самвел Карапетянның жиені. Пашинян 22 қазанда өткізген брифингте Әзербайжанмен бейбітшілік күн тәртібі аясында жаңа Конституцияны қабылдау мақсатында мерзімінен бұрынғы парламенттік сайлау өткізу мүмкіндігін жоққа шығармағанын айтты.

Үкімет басшысының сөзінше, билік конституциялық көпшілікке қол жеткізуге тырысады. Соңғы парламенттік сайлауда Пашиняннің «Азаматтық келісім» партиясы дауыстың 49,81 пайызын жинады. Пашинян опозиция өкілдерін бұл маңызды және принципті мәселе екеніне сендіруге тырысатындарын айтты. Ол мақсатқа жетпеген жағдайда билік мерзімінен бұрынғы сайлауды қоса алғанда, басқа сценарийлерге жүгінетінін қосты.