Ermənistanda müxalifət Paşinyanın erkən seçki açıqlamasına hazır olduğunu bildirdi

Ermənistanda iş adamı və müxalif siyasətçi Samvel Karapetyanın rəhbərlik etdiyi “Güclü Ermənistan” partiyası növbədənkənar seçkilərin keçirilməsinə hazır olduğunu bəyan edib. Partiyanın parlament fraksiyasının rəhbəri Narek Karapetyan, Baş nazir Nikol Paşinyanın növbədənkənar seçkilərlə bağlı açıqlamasına münasibət bildirib.

Narek Karapetyan sosial şəbəkədə “Biz hazırıq. Sadəcə, günü deyin. İnsanlar sonsuz güzəştlərə qarşı səslərini ucaltmalıdırlar” yazıb. O, partiyanın lideri Samvel Karapetyanın qardaşı oğludur. Paşinyan oktyabrın 22-də keçirdiyi brifinqdə Azərbaycanla sülh gündəliyi çərçivəsində yeni Konstitusiyanın qəbulu məqsədilə növbədənkənar parlament seçkilərinin keçirilməsi ehtimalını istisna etməyib.

Baş nazirin sözlərinə görə, hakimiyyət konstitusion çoxluq əldə etməyə çalışacaq. Son parlament seçkilərində Paşinyanın rəhbərlik etdiyi “Vətəndaş Müqaviləsi” partiyası 49,81 faiz səs toplayıb. Paşinyan müxalifət nümayəndələrini bunun mühüm və prinsipial məsələ olduğuna inandırmağa çalışacaqlarını, bu məqsədə nail olmaq mümkün olmasa, hakim qüvvənin növbədənkənar seçkilər də daxil olmaqla digər ssenarilərə əl atacağını bildirib.