Armaniston muxolifati Pashinyanning muddatidan oldingi saylov haqidagi bayonotiga tayyor

Armanistonda biznesmen va muxolif siyosatchi Samvel Karapetyan boshchiligidagi “Kuchli Armaniston” partiyasi muddatidan oldingi saylovlar oʻtkazishga tayyor ekanini eʼlon qildi. Partiyaning parlament fraksiyasi rahbari Narek Karapetyan Bosh vazir Nikol Pashinyanning muddatidan oldingi saylovlar boʻyicha bayonotiga munosabat bildirdi.

Narek Karapetyan ijtimoiy tarmoqda “Biz tayyormiz. Faqat sanani ayting. Odamlar cheksiz imtiyozlarga qarshi ovozlarini baland koʻtarishlari kerak”, deb yozdi. U partiya rahbari Samvel Karapetyanning jiyani hisoblanadi. Pashinyan 22-oktabrdagi brifingda Ozarbayjon bilan tinchlik kun tartibi doirasida yangi Konstitutsiyani qabul qilish maqsadida muddatidan oldingi parlament saylovlari oʻtkazilishi ehtimolini istisno qilmagan.

Bosh vazirning soʻzlariga koʻra, hokimiyat konstitutsiyaviy koʻpchilikka erishishga harakat qiladi. Oxirgi parlament saylovlarida Pashinyan rahbarligidagi “Fuqarolik shartnomasi” partiyasi 49,81 foiz ovoz toʻplagan. Pashinyan muxolifat vakillarini bu muhim va prinsipial masala ekaniga ishontirishga harakat qilishlarini, bu maqsadga erishib boʻlmasa, hukmron kuchning muddatidan oldingi saylovlar ham kiradigan boshqa stsenariylarga murojaat qilishini aytgan.