Қазақстандық оқушы Алидан Саулебек Хьюстондағы олимпиадада жеңіске жетті

Өткен оқу жылында қазақстандық оқушылар халықаралық олимпиадалар мен ғылыми конкурстарда 1000-нан астам медаль жеңіп алды. Бұл жарыстарға 5 мыңнан астам оқушы қатысты. Астана қаласындағы №84 мектеп-лицей оқушысы Алидан Саулебек АҚШ-тың Хьюстон қаласында өткен халықаралық жаратылыстану пәндері олимпиадасында абсолютті жеңімпаз атанды.

Жарысқа Қытай, Моңғолия, Үндістан, Латын Америкасы, Еуропа елдері және Ресей сияқты 15 елдің оқушылары қатысты. Химия пәнінің мұғалімі Эльмира Қажекенова мұндай нәтижеге тек формуланы білумен жетуге болмайтынын, логикалық ойлау мен білімді тәжірибеде қолдана білу қажеттігін айтты.

Алидан алдағы уақытта республикалық химия олимпиадасына дайындалып жатыр және биотехнолог болуды армандайды. Ағарту министрлігінің хабарлауынша, дарынды оқушыларға қолдау күшейтілген: бекітілген тізімдегі жарыстардың жеңімпаздары мен жүлдегерлеріне мемлекеттік сыйлықтар көзделген, ал тәлімгер ұстаздар да ынталандырылады.