Ердоған: Солтүстік Кипр түріктерімен ынтымақтастық жалғасады

Түркия Президенті Режеп Тайып Ердоған Анкарада өтетін Түркі мемлекеттері ұйымының 13-саммиті алдында «Түркі әлемінің ғасыры: ынтымақтастықтан интеграцияға» атты мақала жариялады. Мақала сол күні ұйымға мүше және бақылаушы елдердің жетекші БАҚ-тарында жарық көрді. Олардың арасында Әзірбайжан, Қазақстан, Қырғызстан, Өзбекстан, Солтүстік Кипр Түрік Республикасы, Түркменстан және Венгрия бар.

Мақалада Ердоған түркі әлемінің бірлігі ортақ тарих пен мәдениетке негізделгенін, әлемдік саясаттағы өзгерістер жағдайында түркі мемлекеттерінің ынтымақтастығы стратегиялық қажеттілікке айналғанын атап өтті. Ол экономикалық интеграцияны басым бағыт ретінде көрсетіп, Каспий арқылы өтетін Шығыс-Батыс Орта дәлізінің мүмкіндіктеріне назар аудартты. Қауіпсіздік саласында терроризмге, шекара асқан қылмысқа, киберқауіптерге және табиғи апаттарға қарсы бірлескен іс-қимыл күшейтілетінін айтты.

Кипр мәселесіне тоқталған Ердоған Түркияның Кипр түріктерімен ынтымақтастығын жалғастыратынын мәлімдеді. Ол СКТР-дің ұйымдағы бақылаушы мәртебесінің мүмкіндіктерін кеңейтуге зор мән беретінін және кипр түріктеріне қатысты әділетсіз оқшаулаудың аяқталуы, олардың егемен теңдігі мен тең халықаралық мәртебесін мойындау бағытындағы ұстанымын сақтайтынын айтты. Түркия Анкара саммитінде кезекті төраға лауазымын Әзірбайжаннан қабылдайды.