Адылбек Касымалиев пен Олжас Бектенов тар құрамда екіжақты кездесу өткізді

Қырғызстан Министрлер кабинетінің төрағасы Адылбек Касымалиев ресми сапармен елге келген Қазақстан Премьер-министрі Олжас Бектеновпен тар құрамда екіжақты кездесу өткізді. Кездесу барысында тараптар екіжақты ынтымақтастықтың өзекті мәселелерін талқылады.

Касымалиев екі мемлекет басшыларының саяси ерік-жігерінің арқасында мемлекетаралық ынтымақтастық тұрақты дамып, жаңа серпін алғанын атап өтті. Тұрақты саяси диалог жүргізіліп, сауда-экономикалық, мәдени және гуманитарлық байланыстардың кеңейіп жатқанын айтты. Ол сондай-ақ сапардың екі ел арасындағы стратегиялық серіктестік пен одақтастық қарым-қатынасты нығайтуға үлес қосатынына сенім білдірді. Екінші қырғыз-қазақ аймақаралық форумы мен қырғыз-қазақ үкіметаралық кеңесі отырысының маңыздылығына тоқталды.

Бектенов жылы қабылдағаны үшін алғысын білдіріп, қазақ тарапының ынтымақтастықты кеңейтуге және бірлескен бастамаларды жүзеге асыруға дайын екенін айтты. Кездесуде сауда-экономикалық, инвестициялық, көлік, логистика, энергетика және мәдени-гуманитарлық салалар бойынша мәселелер талқыланып, аймақаралық байланыстарды дамыту туралы пікір алмасылды.