Адылбек Касымалиев менен Олжас Бектенов тар курамда эки тараптуу сүйлөшүү өткөрдү

Кыргызстандын Министрлер кабинетинин төрагасы Адылбек Касымалиев өлкөгө расмий сапар менен келген Казакстандын премьер-министри Олжас Бектенов менен тар курамда эки тараптуу жолугушуу өткөрдү. Жолугушууда тараптар эки тараптуу кызматташтыктын актуалдуу маселелерин талкуулашты.

Касымалиев эки мамлекеттин лидерлеринин саясий эркинин аркасында мамлекетаралык кызматташтык туруктуу өнүгүп, жаңы серпилиш алганын белгиледи. Туруктуу саясий диалог жүрүп жатканын, соода-экономикалык, маданий жана гуманитардык байланыштар кеңейип жатканын айтты. Ошондой эле ал сапардын эки өлкөнүн ортосундагы стратегиялык өнөктөштүктү жана союздаштык мамилелерди бекемдөөгө салым кошорун ишенимдүү билдирди. Экинчи кыргыз-казак аймактар аралык форумунун жана Кыргыз-казак өкмөттөр аралык кеңешинин жыйынынын маанисине токтолду.

Бектенов жылуу тосуп алганы үчүн ыраазычылык билдирип, казак тарап кызматташтыкты кеңейтүүгө жана биргелешкен демилгелерди ишке ашырууга даяр экенин айтты. Жолугушууда соода-экономикалык, инвестициялык, транспорт, логистика, энергетика жана маданий-гуманитардык чөйрөлөр боюнча маселелер талкууланып, аймактар аралык байланыштарды өнүктүрүү боюнча пикир алмашылды.