Әзербайжанда виртуалды активтер туралы заң жобасы желтоқсанда талқыланады

Виртуалды активтер туралы заң жобасы биылғы желтоқсанда Милли Меджіліс талқылауына шығарылуы күтілуде. Modern.az хабарлағандай, бұл туралы Гүндүз Осман Орталық банк төрағасы Талех Казымовпен және сарапшылармен кездесу қорытындылары бойынша фейсбуктегі жазбасында мәлімдеген.

Кездесуде басты мәселелер стейблкоин мен заң жобасы болған. Гүндүз Османның айтуынша, стейблкоин және цифрлық манат бойынша зерттеулер жалғасуда. Нақты модель әлі толық қалыптаспаған, тәсіл тек «1 манат = 1 стейблкоин» моделімен шектелмейді. Кездесуде активтерді токендеу мәселесі де талқыланған.

Кездесуде банктердің мемлекеттік деректерге қол жеткізу мәселесі де қаралды. Талех Казымов бұл бағыт банк секторында цифрландыру үшін басымдығы жоғары екенін атап өткен. Гүндүз Осман азаматтар банк шотын ақысыз ашқанымен, банк мемлекеттік жүйеден сұрау салғанда төлем жасайтынын және көптеген сұраулар банктерге едәуір шығын әкелетінін айтқан. Оның пікірінше, мемлекеттік деректерге қол жеткізу цифрлық қызметтерді жеңілдетуі керек, қосымша шығын көзіне айналмауы тиіс.