Ozarbayjonda virtual aktivlar toʻgʻrisidagi qonun loyihasi dekabrda muhokamaga chiqariladi

“Virtual aktivlar toʻgʻrisida”gi qonun loyihasi bu yilning dekabr oyida Milliy Majlis muhokamasiga chiqarilishi kutilmoqda. Modern.az xabariga koʻra, buni Gündüz Osman Markaziy bank raisi Taleh Kazimov va ekspertlar uchrashuvi yakunlari boʻyicha Facebookdagi xabarida yozgan.

Uchrashuvda asosiy masalalar stablecoin va qonun loyihasi boʻldi. Gündüz Osmanning soʻzlariga koʻra, stablecoin va raqamli manat boʻyicha tadqiqotlar davom etmoqda. Aniq model hali toʻliq shakllanmagan, yondashuv faqat “1 manat = 1 stablecoin” modeli bilan cheklanmaydi. Uchrashuvda aktivlarni tokenlashtirish masalasi ham koʻrib chiqildi.

Uchrashuvda banklarning davlat maʼlumotlariga kirishi masalasi ham muhokama qilindi. Taleh Kazimov bu yoʻnalish bank sektorida raqamlashtirish uchun ustuvor ekanini taʼkidlagan. Gündüz Osman fuqaro bank hisobini bepul ochsa ham, bank davlat tizimidan soʻrov yuborganda toʻlov amalga oshirishini va koʻp sonli soʻrovlar banklar uchun jiddiy xarajat yaratishini yozgan. Uning fikricha, davlat maʼlumotlariga kirish raqamli xizmatlarni osonlashtirishi kerak, qoʻshimcha xarajat manbaiga aylanmasligi lozim.