“Virtual aktivlər” haqqında qanun layihəsi dekabrda müzakirəyə çıxarılacaq

Gözlənilir ki, “Virtual aktivlər haqqında” qanun layihəsi bu ilin dekabrında Milli Məclisin müzakirəsinə çıxarılacaq. Modern.az-ın xəbərinə görə, bunu Gündüz Osman Mərkəzi Bankın sədri Taleh Kazımovla ekspertlərin görüşü barədə feysbuk paylaşımında yazıb.

Görüşdə əsas məsələlər stablecoin və qanun layihəsi olub. Gündüz Osmanın sözlərinə görə, stablecoin və rəqəmsal manat üzrə araşdırmalar davam edir. Konkret model hələ formalaşmayıb, yanaşma yalnız “1 manat = 1 stablecoin” modeli ilə məhdudlaşmır. Aktivlərin tokenləşdirilməsi də müzakirə edilib.

Bankların dövlət məlumatlarına çıxışı da müzakirə olunub; Taleh Kazımov bunun bank sektorunda rəqəmsallaşma üçün prioritet olduğunu vurğulayıb. Gündüz Osman bildirib ki, vətəndaş hesabı pulsuz açsa da, bank dövlət sistemindən sorğu edərkən ödəniş edir və çoxsaylı sorğular banklar üçün ciddi xərc yaradır. Onun fikrincə, dövlət məlumatlarına çıxış rəqəmsal xidmətləri asanlaşdırmalı, əlavə xərc mənbəyinə çevrilməməlidir.