Қазақстанда 799 препараттың бағасы төмендеді: дәрі-дәрмек санының 26%-ы

Елімізде 799 препараттың бағасы төмендеді. Бұл дәрі-дәрмек санының 26%-ы, яғни әрбір төртінші препараттың бағасы арзандаған. Бұл туралы Үкімет отырысында Денсаулық сақтау министрі Ақмарал Әлназарова мәлімдеді, деп хабарлайды Egemen.kz. Министрдің айтуынша, дәрілік заттардың қолжетімділігін арттыру Денсаулық сақтау министрлігінің негізгі басымдықтарының бірі.

Бағаның төмендеуі фармацевтикалық нарықты цифрлық мониторингтеу нәтижесінде анықталған. Айналымдағы дәрілік заттардың жартысынан астамының бағасы тұрақты сақталған. Рецептісіз босатылатын препараттар және құны бір айлық есептік көрсеткіштен төмен рецептілік дәрілер үшін баға реттеу алынып тасталды. Таңбалау жүйесі арқылы дәрілік заттардың айналымына цифрлық бақылау күшейтілді.

Қазақстандықтар eGov Mobile және «Нақты өнім» қосымшалары арқылы препарат, оның өндірушісі және шекті бөлшек баға туралы ақпаратты тексере алады. Заңбұзушылық анықталса, Денсаулық сақтау министрлігіне өтініш жіберуге болады. Ведомство қолжетімділікті арттыру, баға ашықтығы және пациенттердің құқықтарын қорғау бағытында жұмыс жалғасатынын атап өтті. Тегін дәрі алу тәртібі өзгеруі мүмкін.