Түркия CICA форматын толыққанды халықаралық ұйымға айналдыруды қолдайды

Түркия Азиядағы өзара іс-қимыл және сенім шаралары жөніндегі конференцияны (CICA) толыққанды халықаралық ұйымға айналдыруды қолдайтыны мәлім болды. Бұл туралы Түркия сыртқы істер министрі Хакан Фидан Бакуде өткен CICA 7-саммитінде мәлімдеді. Report.az хабарлауынша, министр әлемде дағдарыстардың артуы халықаралық алаңдардағы белгісіздікті күшейтіп отырғанын атап өтті.

Министрдің айтуынша, ортақ мәселелерге бірлесіп шешім табу бұрынғыдан да маңызды. "Халықаралық субъектілер арасындағы сенім жетіспеушілігі қажетті көпжақты ынтымақтастыққа негізгі кедергі болып қалып отыр", – деді ол.

Фиданның сөзінше, Түркия аймақтық жауапкершілік пен бастамашылық қағидаттарына негізделген ынтымақтастық арқылы өзара сенімді нығайтатын диалог мәдениетін дамытуды басым бағыт деп санайды. "CICA диалогты нақты ынтымақтастыққа айналдыруда маңызды рөл атқара алады", – деп атап өтті министр.