Түркиянын бийлик партиясы: Россия ТМУда байкоочу статусунун талаптарына ылайык келбейт

Түркиядагы бийликтеги Адилеттүүлүк жана өнүгүү партиясы (AKP) Россиянын Түрк мамлекеттеринин уюмуна (ТМУ) байкоочу катары кошулуу талаптарына ылайык келбейт деп эсептейт. Партиянын төрагасынын орун басары Күршад Зорлу Anadolu агенттигине берген комментарийинде, байкоочу статусу үчүн түрк же туугандаш тилдердин бири бир гана регионда эмес, өлкөнүн бүт аймагында мамлекеттик же расмий статуска ээ болушу керектигин айтты.

Зорлу бул критерийге жооп бербеген мамлекеттер үчүн үчүнчү өлкөлөр менен ийкемдүү кызматташууну көздөгөн «ТМУ +» деген формат бар экенин билдирди. Ошондой эле ал ТҮРКСОЙдун байкоочу мүчөлөрү болгон Алтай, Тыва, Чуваш, Башкортостан, Якутия жана Татарстан менен маданий кызматташтыкты калыбына келтирүүнү сунуштады. Зорлунун айтымында, 2015-жылы Россия бийликтеринин чечими бул кызматташтыкты иш жүзүндө токтоткон.

Бул талкуу 30-октябрда Анкарадагы ТМУ саммитинен кийин жаралды. Анда Казакстандын президенти Касым-Жомарт Токаев Россияны «ТМУ +» форматына чакыруу же ага байкоочу статусун берүү сунушун айткан. Кремлдин матбуат катчысы Дмитрий Песков Москванын катышуусун «түшүнүктүү жана максатка ылайыктуу» деп атаган, бирок расмий чакырык али келе элек экенин айткан.