Шакира Кыргызстанга келди: бүгүнкү концерт жөнүндө билүү керек нерселер

Дүйнөгө белгилүү колумбиялык ырчы Шакира 18-октябрдын түнүндө Кыргызстанга келди. Бишкек анын Las Mujeres Ya No Lloran World Tour дүйнөлүк турнесинин токтоо жайларынын бири болду. «Манас» эл аралык аэропортунда Шакираны Президенттин администрациясынын маалымат саясаты бөлүмүнүн жетекчиси Дайырбек Орунбеков жана Президенттин иштер башкармасынын биринчи орун басары Бообек Салымжанов тосуп алды.

Концерт бүгүн, 18-октябрда, «Бишкек Аренада» саат 19:00дө башталат. Программада Hips Don’t Lie, Waka Waka жана Whenever, Wherever сыяктуу хиттер бар. Концерт күнү стадион аймагында кыймыл схемасы өзгөрдү: саат 07:00дөн баштап Аалы Токомбаев, Муромская, Эр-Тайлак жана Куюков көчөлөрүнүн айрым бөлүктөрүндө унаа жүрүшү убактылуу чектелди.

Көрүүчүлөр үчүн саат 15:00дөн 18:00гө чейин төрт-алты мүнөттүк аралыкта «Бишкек Аренага» каттай турган алты акысыз автобус маршруту уюштурулду. Концерттен кийин автобустар көрүүчүлөрдү кайра алып барат. Уюштуруучулар жолду алдын ала пландоону жана мүмкүн болсо коомдук транспортту колдонууну сунуштайт. Билеттер расмий GovTicket платформасында дагы жеткиликтүү. Бул Шакиранын Борбордук Азиядагы биринчи концерти.