Электр энергиясын импорттоо качан токтойт? Министрдин жообу

Кыргызстан электр энергиясын импорттоого болгон муктаждыктан арылуу үчүн ири гидроэлектр станцияларын (ГЭС) куруусу керек. Бул тууралуу энергетика министри Алтынбек Рысбеков Жогорку Кеңештин тиешелүү комитетинин жыйынында билдирди.

Депутаттардын электр энергиясын импорттоо качан токтотулары тууралуу суроосуна жооп берген министр, өлкөдө учурда күн электр станциялары жана чакан ГЭСтер курулуп жатканын, бирок булардын электр энергиясына болгон таңкыстыкты толук жабууга жетишсиз экенин айтты.

Ири ГЭСтерди жана "Кара-Кече" жылуулук электр станциясын куруу пландарын ишке ашыруу электр энергиясынын таңкыстыгын ички өндүрүштүн эсебинен жабууга шарт түзөт. Министр: "Бул өз кезегинде импортко болгон муктаждыкты жоюуга мүмкүндүк берет", - деди.