Qirgʻizistonda elektr energiyasi importi qachon toʻxtaydi? Vazir javobi

Qirgʻizistonda elektr energiyasi importiga ehtiyojdan xalos boʻlish uchun yirik gidroelektr stansiyalari (GES) qurilishi kerakligi aytildi. Energetika vaziri Altinbek Risbekov bu haqda mamlakat parlamenti Oliy Kengashining tegishli qoʻmitasi majlisida bildirdi.

Deputatlarning elektr energiyasi importi qachon toʻxtatilishi haqidagi savoliga javob bergan vazir hozirda mamlakatda quyosh elektr stansiyalari va kichik GESlar qurilayotganini, biroq ular elektr energiyasi tanqisligini toʻliq qoplashga yetarli emasligini aytdi.

Vazir yirik GESlar va "Kara-Keche" issiqlik elektr stansiyasini qurish rejalarini amalga oshirish tanqislikni ichki ishlab chiqarish hisobiga qoplashga shart-sharoit yaratishini taʼkidladi. Uning soʻzlariga koʻra, bu importga boʻlgan ehtiyojni yoʻqotishga imkon beradi.