Шайлоого даярдык: республикалык штабдын биринчи жыйыны өттү

Кыргыз Республикасынын президентин кезектеги шайлоону даярдоодо жана өткөрүүдө шайлоо комиссияларына көмөк көрсөтүү боюнча республикалык штабдын биринчи жыйыны 2026-жылдын 20-октябрында Бишкекте өттү. Жыйынга Министрлер кабинетинин төрагасы Адылбек Касымалиев төрагалык кылды. Шайлоо 2027-жылдын 27-январына дайындалган.

Күн тартибине төрт маселе киргизилди. Борбордук шайлоо комиссиясы президенттик шайлоого даярдык, календардык план, шайлоочулардын тизмелерин тактоо жана шайлоо участокторунун даярдыгы боюнча маалымат берди. Тышкы иштер министрлиги чет өлкөлөрдөгү шайлоо участокторун жана чет жакта жүргөн жарандардын шайлоо укуктарын ишке ашырууну баяндады. Ички иштер министрлиги шайлоо өнөктүгүндө жана добуш берүү күнү коомдук тартипти жана коопсуздукту камсыз кылуу боюнча маалымат берди. Президенттин Иш башкармалыгына караштуу «Кызмат» мамлекеттик мекемеси шайлоочуларды биометрикалык идентификациялоо, Face ID, манжа издери, техникалык жабдуулар, байланыш жана башка даярдыктар боюнча маалымат берди.

Баяндамалардан кийин штабдын мүчөлөрү жыйында каралган маселелерди талкуулады. Адылбек Касымалиев алдыдагы президенттик шайлоонун элдин жана мамлекеттин келечеги үчүн маанилүү саясий окуя экенин айтты. Шайлоону даярдоо жана өткөрүү боюнча календардык планды ишке ашырууга жооптуу бардык жетекчилерге тапшырмаларды дыкат жана өз убагында аткаруу тапшырылды.