Қырғызстанда президент сайлауына арналған республикалық штабтың алғашқы отырысы өтті

Қырғыз Республикасы президентінің кезекті сайлауын дайындауда және өткізуде сайлау комиссияларына көмек көрсету жөніндегі республикалық штабтың алғашқы отырысы 2026 жылғы 20 қазанда Бішкекте өтті. Отырысқа Министрлер кабинетінің төрағасы Адылбек Қасымалиев төрағалық етті. Сайлау 2027 жылғы 27 қаңтарға белгіленген.

Күн тәртібіне төрт мәселе енгізілді. Орталық сайлау комиссиясы президенттік сайлауға дайындық, күнтізбелік жоспар, сайлаушылар тізімін нақтылау және сайлау учаскелерінің дайындығы туралы баяндады. Сыртқы істер министрлігі шетелдегі сайлау учаскелері және шетелде жүрген азаматтардың сайлау құқықтарын іске асыру туралы ақпарат берді. Ішкі істер министрлігі сайлау науқанында және дауыс беру күні қоғамдық тәртіп пен қауіпсіздікті қамтамасыз ету туралы хабарлады. Президенттің Іс басқармасына қарасты «Кызмат» мемлекеттік мекемесі сайлаушыларды биометриялық сәйкестендіру, Face ID, саусақ іздері, техникалық жабдықтар және байланыс туралы мәлімет ұсынды.

Баяндамалардан кейін штаб мүшелері отырыста қаралған мәселелерді талқылады. Адылбек Қасымалиев алдағы президенттік сайлаудың халық пен мемлекет үшін маңызды саяси оқиға екенін атап өтті. Күнтізбелік жоспарды іске асыруға жауапты барлық басшыларға тапсырмаларды мұқият және уақытылы орындауды тапсырды.