АКШ жана Борбордук Азия өлкөлөрү ядролук объекттерди биргелешип коргоого макулдашты

Самаркандда C5+1 форматындагы тышкы иштер министрлеринин жолугушуусу өттү. Жолугушууга Казакстан, Кыргызстан, Тажикстан, Түркмөнстан жана Өзбекстандын тышкы иштер министрлери, ошондой эле АКШнын мамлекеттик катчысы катышты. Жолугушуунун чоо-жайын АКШнын Казакстандагы элчилиги жарыялады.

Катышуучулар ядролук материалдардын коопсуздугун камсыз кылуу жана тиешелүү объекттерди коргоо боюнча практикалык кызматташтыкты тереңдетүү ниетин ырастады. Тараптар Борбордук Азиядагы ядролук куралсыз зона жөнүндөгү келишимге таянып, атом энергиясын тынч максаттарда колдонууну өнүктүрүүнү көздөйт.

Билдирүүдө АКШ менен Борбордук Азия өлкөлөрүнүн ортосундагы узак мөөнөттүү кызматташтык жогору бааланып, аймактагы ядролук коопсуздук чөйрөсүндөгү экспертизаны жана потенциалды бекемдөөгө биргелешкен салым кошулганы белгиленди.

Тараптар киберкоркунучтарга биргелешип жооп берүү боюнча макулдашты жана кибер чабуулдарга жана киберкылмышка каршы күрөштө бирдиктүү мамилелерди калыптандырууну пландаштырат. Ошондой эле чек араларды бекемдөө, курал контрабандасы, баңги заттардын трафиги жана мыйзамсыз миграцияга каршы күрөш боюнча макулдашуулар бар. Укук коргоо органдары жана маданий мекемелер археологиялык баалуулуктарды коргоо жана байыркы антиквариат буюмдардын мыйзамсыз алып чыгылышынын алдын алуу үчүн биргелешип иштейт.