АҚШ пен Орталық Азия елдері ядролық объектілерді бірлесіп қорғауға келісті

Самарқандта C5+1 форматындағы сыртқы істер министрлерінің кездесуі өтті. Кездесуге Қазақстан, Қырғызстан, Тәжікстан, Түркменстан және Өзбекстан сыртқы істер министрлері, сондай-ақ АҚШ мемлекеттік хатшысы қатысты. Кездесу туралы мәліметтерді АҚШ-тың Қазақстандағы елшілігі ұсынды.

Қатысушылар ядролық материалдардың сақталуын қамтамасыз ету және тиісті объектілерді қорғау саласында практикалық ынтымақтастықты тереңдетуге ниет білдірді. Тараптар Орталық Азиядағы ядролық қарусыз аймақ туралы шартқа сүйене отырып, атом энергиясын бейбіт мақсатта пайдалануды дамытуды көздеп отыр.

Мәлімдемеде АҚШ пен Орталық Азия елдері арасындағы ұзақ мерзімді ынтымақтастық жоғары бағаланып, аймақтағы ядролық қауіпсіздік саласындағы сараптама мен әлеуетті нығайтуға ортақ үлес қосылғаны атап өтілді.

Тараптар киберқауіптерге бірлесіп жауап беруге келісті және киберсхабуылдар мен киберқылмысқа қарсы күресте бірыңғай тәсілдер қалыптастыруды көздейді. Сонымен қатар шекараларды нығайту, қару контрабандасы, есірткі трафигі және заңсыз көші-қонға қарсы күресте де келісімдерге қол жеткізілді. Құқық қорғау органдары мен мәдени мекемелер археологиялық құндылықтарды қорғау және ежелгі антиквариат заттардың заңсыз әкетілуінің алдын алу үшін бірлесіп жұмыс істейді.