ABŞ və Mərkəzi Asiya ölkələri nüvə obyektlərinin birgə qorunmasına razılaşdı

Səmərqənddə C5+1 formatında xarici işlər nazirlərinin görüşü keçirildi. Görüşdə Qazaxıstan, Qırğızıstan, Tacikistan, Türkmənistan və Özbəkistanın xarici işlər nazirləri və ABŞ dövlət katibi iştirak etdi. Görüşün təfərrüatlarını ABŞ-ın Qazaxıstandakı səfirliyi açıqladı.

İştirakçılar nüvə materiallarının təhlükəsizliyinin təmin edilməsi və əlaqəli obyektlərin qorunması sahəsində praktiki əməkdaşlığı dərinləşdirmək niyyətini təsdiqlədi. Tərəflər Mərkəzi Asiyada nüvə silahından azad zona haqqında müqaviləyə əsaslanaraq atom enerjisindən sülh məqsədləri üçün istifadəni inkişaf etdirməyi planlaşdırır.

Bəyanatda ABŞ ilə Mərkəzi Asiya ölkələri arasında uzunmüddətli əməkdaşlığa yüksək qiymət verildiyi və regionda nüvə təhlükəsizliyi sahəsində ekspertiza və potensialın gücləndirilməsinə birgə töhfə qeyd edildi.

Tərəflər kiber təhdidlərə birgə cavab verilməsi barədə razılığa gəlib. Kiber hücumlar və kibercinayətlə mübarizə üçün vahid yanaşmaların formalaşdırılması nəzərdə tutulur. Sərhədlərin möhkəmləndirilməsi, silah qaçaqmalçılığı, narkotrafik və qanunsuz miqrasiyaya qarşı mübarizə üzrə də razılaşma əldə edilib. Hüquq-mühafizə orqanları və mədəni qurumlar arxeoloji sərvətlərin qorunması və qədim əşyaların qanunsuz ixracının qarşısının alınması üçün birləşəcək.