Cengiz Holding Өзбекстанда 550 МВт кубаттуулуктагы жаңы станция курат

Түрк Cengiz Holding компаниясы 2026-жылдын аягына чейин Өзбекстандын Жизак облусунда 550 МВт кубаттуулугу бар буу-газ электр станциясын иштетүүнү пландаштырууда. Холдингдин башкаруу төрагасы Мехмет Ченгиз бул тууралуу 16-октябрда Президент Шавкат Мирзиёев менен жолугушууда билдирди.

Ченгиздин айтуусу боюнча, бул долбоор компаниянын Өзбекстандагы үчүнчү энергетикалык долбоору болуп, анын баасы болжол менен 800 миллион доллар. Ал холдингдин өлкөдөгү жалпы инвестициясы 900 миллион доллардан ашканын белгиледи. Ташкент жана Сырдарыя облустарындагы долбоорлордон кийин компаниянын курган объекттеринин жалпы орнотулган кубаттуулугу 1010 МВт жетет.

Ченгиз ошондой эле Өзбекстандагы төртүнчү долбоорду карап жатканын жана энергетикадан тышкары тармактарда мүмкүнчүлүктөрдү изилдеп жатканын айтты. Мирзиёев холдингтен Жаңы Ташкентти курууга катышуу боюнча сунуштарды берүүнү суранды. Жизак станциясын 2025-жылы иштетүү пландалган болучу.