Cengiz Holding Jizzaxda 550 MVt quvvatli yangi elektr stansiyasini quradi

Turk kompaniyasi Cengiz Holding 2026-yil oxirigacha Oʻzbekistonning Jizzax viloyatida quvvati 550 MVt boʻlgan parogaz elektr stansiyasini ishga tushirishni rejalashtirmoqda. Holding boshqaruv raisi Mehmet Cengiz buni 16-oktabr kuni Prezident Shavkat Mirziyoyev bilan uchrashuvda maʼlum qildi.

Cengizning aytishicha, bu loyiha kompaniyaning Oʻzbekistondagi uchinchi energetika loyihasi boʻlib, uning qiymati taxminan 800 million dollarni tashkil etadi. Uning soʻzlariga koʻra, holdingning mamlakatdagi umumiy investitsiyalari 900 million dollardan oshgan. Toshkent va Sirdaryo viloyatlaridagi loyihalardan keyin kompaniya qurgan obyektlarning umumiy oʻrnatilgan quvvati 1010 MVt ga yetadi.

Cengiz, shuningdek, toʻrtinchi loyiha ustida ish olib borilayotganini va energetikadan tashqari sohalarda ham imkoniyatlar oʻrganilayotganini aytdi. Mirziyoyev holding rahbaridan Yangi Toshkent qurilishida ishtirok etish boʻyicha takliflar taqdim etishni soʻradi. Eslatib oʻtamiz, Jizzax stansiyasini 2025-yilda ishga tushirish rejalashtirilgan edi.