ТүркПАнын XV пленардык отуруму Бишкекте аяктап, Бишкек декларациясы кабыл алынды

Бишкектеги «Ырыс-Ордо» конгресс-холунда өткөн Түрк мамлекеттеринин Парламенттик ассамблеясынын (ТүркПА) XV пленардык отуруму жыйынтыкталып, Бишкек декларациясы кабыл алынды. Kabar маалымат агенттигинин кабарлоосунда, документте отурумда каралган маселелер боюнча сунуш-пикирлер жана корутунду чечимдер камтылганы билдирилди.

Отурум «Жасалма интеллект жана технологиялык прогресс доорунда түрк дүйнөсүндөгү парламенттер аралык кызматташтык» темасында өттү. Отурумга төрагалык кылган Жогорку Кеңештин төрагасы Марлен Маматалиев парламенттер аралык кызматташтыкты өнүктүрүүгө, тажрыйба алмашууга жана уюмдун ишинин натыйжалуулугун жогорулатууга өзгөчө көңүл бурулганын белгилеп, төрт жаңы моделдик мыйзам кабыл алынганын эске салды. Ошондой эле ал Кыргызстандын санариптештирүү, жасалма интеллект, жаштар саясаты жана маданий-гуманитардык багыттарда кызматташтыкты кеңейтүүгө кызыкдар экенин кошумчалады.

Басма сөз жыйынында Азербайжандын Милли Меджлисинин төрайымы Сахиба Гафарова, Казакстан Курултайынын төрагасы Айбек Дадебай, Түркиянын Улуу Улуттук Жыйынынын төрагасы Нуман Куртулмуш жана ТүркПАнын башкы катчысы Рамил Хасан сөз сүйлөдү. Отурумдун катышуучулары Бишкектеги отурумдар жогорку деңгээлде уюштурулганын белгешип, Марлен Маматалиевге ыраазычылыгын билдиришти.