TurkPA XV plenar majlisi Bishkekda yakunlandi, Bishkek deklaratsiyasi qabul qilindi

Bishkekdagi “Iris-Orda” kongress markazida oʻtkazilgan Turkiy davlatlar parlament assambleyasining (TurkPA) XV plenar majlisi yakunlandi va Bishkek deklaratsiyasi qabul qilindi. Kabar axborot agentligining xabar berishicha, hujjatda majlisda koʻrib chiqilgan masalalar boʻyicha takliflar, fikrlar va xulosaviy qarorlar mujassamlangan.

Majlis “Sunʼiy intellekt va texnologik taraqqiyot davrida turkiy dunyoda parlamentlararo hamkorlik” mavzusida oʻtkazildi. Majlisga raislik qilgan Qirgʻiziston Oliy Kengashi raisi Marlen Mamataliyev parlamentlararo hamkorlikni rivojlantirish, tajriba almashish va tashkilot samaradorligini oshirishga alohida eʼtibor qaratilganini taʼkidladi hamda toʻrtta yangi model qonun qabul qilinganini eslatdi. U, shuningdek, Qirgʻiziston raqamlashtirish, sunʼiy intellekt, yoshlar siyosati va madaniy-gumanitar yoʻnalishlarda hamkorlikni kengaytirishdan manfaatdorligini qoʻshimcha qildi.

Matbuot anjumanida Ozarbayjon Milliy Majlisi raisi Sahiba Gafarova, Qozogʻiston Kurultoyi raisi Aybek Dadebay, Turkiya Buyuk Milliy Majlisi raisi Numan Kurtulmush va TurkPA bosh kotibi Ramil Hasan soʻzga chiqdi. Ishtirokchilar Bishkekdagi majlislar yuqori darajada tashkil etilganini qayd etib, Mamataliyevga minnatdorchilik bildirdi.