TürkPA-nın XV plenar iclası Bişkekdə başa çatdı, Bişkek Bəyannaməsi qəbul edildi

Bişkekdəki “Irıs-Orda” konqres mərkəzində keçirilən Türk Dövlətləri Parlament Assambleyasının (TürkPA) XV plenar iclası yekunlaşdı və Bişkek Bəyannaməsi qəbul edildi. Kabar xəbər agentliyinin məlumatına görə, sənəddə iclasda müzakirə olunan məsələlər üzrə təkliflər, rəylər və yekun qərarlar əks olunub.

İclas “Süni intellekt və texnoloji tərəqqi dövründə Türk dünyasında parlamentlərarası əməkdaşlıq” mövzusunda keçirilib. İclasa sədrlik edən Qırğızıstan Ali Kengeşinin sədri Marlen Mamataliev parlamentlərarası əməkdaşlığın inkişafına, təcrübə mübadiləsinə və təşkilatın səmərəliliyinin artırılmasına xüsusi diqqət yetirildiyini bildirib, dörd yeni model qanunun qəbul edildiyini xatırladıb. O, həmçinin Qırğızıstanın rəqəmsallaşma, süni intellekt, gənclər siyasəti və mədəni-humanitar sahələrdə əməkdaşlığı genişləndirməkdə maraqlı olduğunu vurğulayıb.

Mətbuat konfransında Azərbaycan Milli Məclisinin sədri Sahibə Qafarova, Qazaxıstan Kurultayının sədri Aybek Dadebay, Türkiyə Böyük Millət Məclisinin sədri Numan Kurtulmuş və TürkPA-nın baş katibi Ramil Həsən çıxış ediblər. İclas iştirakçıları Bişkekdəki iclasların yüksək səviyyədə təşkil edildiyini qeyd edərək Mamatalievə minnətdarlıq ediblər.