Өзбекстанда 2030-жылга чейин IT тармагында дагы 500 миң жумуш ордун түзүү пландалууда

Президент Шавкат Мирзиёев 20-октябрда санариптик билим берүү экосистемасын өнүктүрүүгө арналган презентация менен таанышты, деп билдирди мамлекет башчысынын басма сөз кызматы. Кабарда айтылгандай, маалымат технологиялары тармагында 2030-жылга чейин 300 миң жумуш ордун түзүү максатына ушул жылы эле жетишилген. Эми санариптик экономиканын жаңы багыттарын өнүктүрүү аркылуу 2030-жылга чейин дагы 500 миң жумуш ордун түзүү пландалууда.

Презентацияда жаштарды окутуудан баштап, алардын кесиптик көндүмдөрүн ырастоого жана жумушка орноштурууга чейинки бардык процессти камтыган бирдиктүү санариптик билим берүү экосистемасын калыптандыруу зарылдыгы белгиленди. 2030-жылга чейин 5,5 миллион жашты салттуу жана алыстан окутуу формаларында окутуу каралып жатат. Президент робототехника, компьютердик оюндарды түзүү, стартаптар жана башка келечектүү багыттар боюнча жыл сайын бир миллион жашты окутуу милдетин койду.

Санариптик билим берүүгө тартылган гранттар да көбөйтүлөт. Өткөн жылы бул багытта 22 миллион доллар грант тартылган. Максат — жылдын аягына чейин бул көрсөткүчтү 60 миллион долларга, 2030-жылга карата жылына 100 миллион долларга жеткирүү. Президент билим берүүнүн сапаты жана анын жумуштуулукка таасири негизги критерий болушу керек экенин белгиледи.