Oʻzbekistonda IT sohasida 2030 yilgacha yana 500 ming ish oʻrni yaratish rejalashtirilmoqda

Prezident Shavkat Mirziyoyev 20 oktyabr kuni raqamli taʼlim ekotizimini rivojlantirishga oid taqdimot bilan tanishdi, deb xabar bermoqda davlat rahbari matbuot xizmati. Xabarga koʻra, axborot texnologiyalari sohasida 2030 yilgacha 300 ming ish oʻrni yaratish boʻyicha belgilangan maqsadga joriy yilning oʻzida erishilgan. Endi raqamli iqtisodiyotning yangi yoʻnalishlarini rivojlantirish orqali 2030 yilgacha yana 500 ming ish oʻrni yaratish rejalashtirilmoqda.

Taqdimotda yoshlarni oʻqitishdan tortib, ularning kasbiy koʻnikmalarini tasdiqlash va ishga joylashtirishgacha boʻlgan jarayonlarni qamrab oluvchi yagona raqamli taʼlim ekotizimi shakllantirilishi zarurligi taʼkidlangan. Prezident robototexnika, kompyuter oʻyinlarini yaratish, startaplar va boshqa yoʻnalishlarda yiliga bir million nafar yoshni oʻqitish vazifasini qoʻydi.

Raqamli taʼlimga jalb qilinadigan grantlar koʻpaytiriladi. Oʻtgan yili bu yoʻnalishda 22 million dollarlik grant jalb qilingan. Joriy yil yakuniga qadar bu koʻrsatkichni 60 million dollarga, 2030 yilga borib esa yiliga 100 million dollarga yetkazish topshirilgan. Prezident raqamli taʼlimda taʼlim sifati va uning bandlikka taʼsiri asosiy mezon boʻlishi kerakligini taʼkidladi.