Эттин баасын 770 сомдон ашырбоо чечими кабыл алынды – Акунбеков

Кыргызстанда эттин баасын төмөндөтүү максатында малды экспорттоого 6 айлык мораторий киргизилди, ал эми Бишкекте этти 680 сомдон сатып жаткан 10 фудтрак пилоттук режимде ишке киргизилди. Бул тууралуу министрлер кабинетинин төрагасынын орун басары, суу ресурстары, айыл чарба жана кайра иштетүү өнөр жайы министри Эрлист Акунбеков Жогорку Кеңештин бүгүнкү жыйынында билдирди.

Анын айтымында, Россиядан алынып келинген мал жол чыгымдары кошулгандан кийин да базар баасынан арзан сатылууда. Бул чаралардын натыйжасында малдын баасы бир аз төмөндөдү. Монополияга каршы жөнгө салуу кызматы эттин баасын 770 сомдон ашырбоо боюнча чечим кабыл алган. Министр мындай деди: «Бул аракеттердин эсебинен эт дагы арзандайт деген пландарыбыз бар».

Министр эттин баасын төмөндөтүүдө керектөөчүлөрдүн кызыкчылыгы менен катар мал чарбачылыгы менен алектенген фермерлердин абалын да эске алуу зарыл экенин белгиледи. Малдын баасы арзандашы үчүн биринчи кезекте жемдин баасын төмөндөтүү керектигин, бул багытта иштер жүрүп жатканын айтты. Ошондой эле жеңилдетилген насыя берүүнүн эки багыты бар экенин, мүмкүнчүлүккө жараша каржылоо жүргүзүлүп жатканын кошумчалады. Министрдин маалыматына караганда, товардык интервенция жана жеңилдетилген насыя берүү чаралары да каралган.