Goʻsht narxini 770 somdan oshirmaslik qarori qabul qilindi – Akunbekov

Qirgʻizistonda goʻsht narxini pasaytirish maqsadida chorva mollarini eksport qilishga 6 oylik moratoriy joriy etildi, Bishkekda goʻshtni 680 somdan sotadigan 10 ta fudtrak sinov tartibida ishga tushirildi. Bu haqda Vazirlar Mahkamasi raisining oʻrinbosari, suv resurslari, qishloq xoʻjaligi va qayta ishlash sanoati vaziri Erlist Akunbekov Oliy Kengashning bugungi majlisida maʼlum qildi.

Akunbekovning aytishicha, Rossiyadan keltirilgan mollar yoʻl xarajatlari qoʻshilganidan keyin ham bozor narxidan arzonroq sotilmoqda. Bu choralar natijasida mollarning narxi biroz pasaygan. Monopoliyaga qarshi tartibga solish xizmati goʻshtning narxi 770 somdan oshmasligi boʻyicha qaror qabul qilgan. Vazir: «Bu harakatlar hisobiga goʻsht yana arzonlashadi, degan rejamiz bor», — dedi.

Vazir goʻsht narxini pasaytirishda isteʼmolchilar manfaatlari bilan birga chorvachilik bilan shugʻullanuvchi dehqonlar ahvolini ham hisobga olish zarurligini taʼkidladi. Mollar narxi arzonlashishi uchun avvalo ozuqa narxini pasaytirish kerakligini, bu yoʻnalishda ishlar davom etayotganini aytdi. Vazirlikning maʼlumotiga koʻra, goʻsht narxini tartibga solish doirasida tovar intervensiyasi va imtiyozli kreditlash choralari ham koʻzda tutilgan.