Түрк «үй-бүлөсү» Анкарадагы маанилүү саммитке даярдануда

Түркия быйыл бир катар эл аралык саммиттерди өткөрдү. Эми Түрк мамлекеттери уюмунун (ТМУ) лидерлери 29–30-октябрда Анкарада чогулушат. Түрк расмийлеринин көбүнчө “туугандаш өлкөлөрдүн үй-бүлөлүк кеңеши” деп атаган бул жыйында маанилүү чечимдер кабыл алынат деп күтүлүүдө.

Мүчө мамлекеттер — Азербайжан, Казакстан, Кыргызстан жана Өзбекстан, ошондой эле байкоочу мамлекеттер — Венгрия, Түндүк Кипрдеги Түрк Республикасы жана Түркмөнстан президенттеринин катышуусу күтүлүүдө. ТМУнун кезектеги төрагалык укугу Азербайжандан Түркияга өтөт. Президент Режеп Тайып Эрдоган Ильхам Алиев жана башка катышуучу лидерлер менен эки тараптуу жолугушууларды өткөрөт. Казакстандын президенти Касым-Жомарт Токаев да 28-октябрда эки тараптуу сапар алкагында Анкарага келет.

Күн тартибинде экономикалык жана соода байланыштары, транспорт жана энергетикалык байланыш, билим берүү жана технология боюнча кызматташтык турат. ТМУ 2009-жылы Нахчыван келишими менен түзүлүп, 2021-жылы аты өзгөртүлгөн.