Өзбекстан 2030-жылга чейин жылына 1 миллион унаа чыгарууну пландап жатат

Өзбекстан 2030-жылга чейин жеңил унаа өндүрүшүн жылына 1 миллион бирдикке жеткирүүнү пландап жатат, анын 200 миңи электромобиль болот. Көрсөткүчтөр жергиликтүү чийки зат базасынан натыйжалуу пайдаланууга жана илгерилетилген технологияларга негизделген өнөр жайды өнүктүрүүгө арналган «Өзбекстан — 2030» стратегиясынын 47-максатында бекитилген. Бул жөнүндө Өзбекстан Президентинин алдындагы Стратегиялык өнүгүү жана реформалар агенттиги маалымдады.

Жеңил унаа өндүрүшү баскычтап көбөйүшү керек. 2025-жыл үчүн көрсөткүч 450 миң бирдик, 2026-жылы 500 миң, 2027-жылы 560 миң, 2028-жылы 650 миң жана 2029-жылы 800 миң бирдик болуп белгиленген. Электромобилдер боюнча көрсөткүчтөр 2025-жылы 20 миң, 2026-жылы 40 миң, 2027-жылы 50 миң, 2028-жылы 70 миң жана 2029-жылы 130 миң.

Өнөр жайдагы технологиялык продукциянын өндүрүшү 2030-жылга чейин 2023-жылга салыштырмалуу 2,5 эсе көбөйтүлөт деп пландалууда. Металл казып алуу жана өндүрүү 2024-жылга салыштырмалуу өсүшү керек: жез өндүрүшү 3,5 эсе, күмүш менен уран өндүрүшү үч эсе өсүшү күтүлөт. Агенттиктин баалоосу боюнча, бул максаттар жогорку технологиялуу тармактарды өнүктүрүүгө жана жаңы жумуш орундарын түзүүгө жардам берет.