Oʻzbekiston 2030 yilga borib yiliga 1 million avtomobil ishlab chiqarmoqchi

Oʻzbekiston 2030 yilga borib yengil avtomobillar ishlab chiqarishni yiliga 1 million donaga yetkazishni rejalashtirmoqda, shundan 200 ming donasi elektromobil boʻladi. Maqsadli koʻrsatkichlar mahalliy xomashyo bazasidan samarali foydalanish va ilgʻor texnologiyalarga asoslangan sanoatni rivojlantirishga bagʻishlangan “Oʻzbekiston — 2030” strategiyasining 47-maqsadida belgilangan. Bu haqda Oʻzbekiston Prezidenti huzuridagi Strategik rivojlanish agentligi xabar bergan.

Yengil avtomobillar ishlab chiqarish bosqichma-bosqich oshishi kerak. 2025 yil uchun koʻrsatkich 450 ming dona, 2026 yil uchun 500 ming, 2027 yil uchun 560 ming, 2028 yilda 650 ming va 2029 yilda 800 ming dona etib belgilangan. Elektromobillar boʻyicha koʻrsatkichlar esa 2025 yilda 20 ming, 2026 yilda 40 ming, 2027 yilda 50 ming, 2028 yilda 70 ming va 2029 yilda 130 ming dona.

Sanoatda texnologik mahsulotlar ishlab chiqarish 2030 yilga borib 2023 yilga nisbatan 2,5 barobar oshirilishi rejalashtirilgan. Metallar qazib olish 2024 yilga nisbatan oshadi, mis ishlab chiqarish 3,5 barobar, kumush va uran ishlab chiqarish esa uch barobar oshirilishi kutilmoqda. Agentlikning bahosicha, bu maqsadlar yuqori texnologiyali tarmoqlarni rivojlantirishga, yangi ish oʻrinlari yaratishga va mahalliy xomashyoni chuqur qayta ishlash orqali raqobatbardoshlikni oshirishga yordam beradi.