Өзбекстан 2030 жылға қарай жылына 1 миллион автомобиль шығаруды жоспарлап отыр

Өзбекстан 2030 жылға қарай жеңіл автомобильдер өндірісін жылына 1 миллион данаға жеткізуді жоспарлап отыр, оның 200 мыңы электромобильдер болады. Көрсеткіштер жергілікті шикізат базасын тиімді пайдалануға және озық технологияларға негізделген өнеркәсіпті дамытуға арналған «Өзбекстан — 2030» стратегиясының 47-мақсатында бекітілген. Бұл туралы Өзбекстан Президенті жанындағы Стратегиялық даму және реформалар агенттігі хабарлайды.

Жеңіл автомобиль шығару кезеңдермен артуы тиіс. 2025 жылға арналған межелік көрсеткіш 450 мың данаға, 2026 жылы 500 мыңға, 2027 жылы 560 мыңға, 2028 жылы 650 мыңға, 2029 жылы 800 мыңға тең. Электромобильдер бойынша көрсеткіштер 2025 жылы 20 мың, 2026 жылы 40 мың, 2027 жылы 50 мың, 2028 жылы 70 мың және 2029 жылы 130 мың.

Өнеркәсіптегі технологиялық өнім өндірісін 2030 жылға қарай 2023 жылмен салыстырғанда 2,5 есе ұлғайту жоспарланған. Металл өндірісі 2024 жылмен салыстырғанда өсуі тиіс: мыс өндірісі 3,5 есе, ал күміс пен уран өндірісі үш есе ұлғайтылуы көзделген. Агенттіктің бағалауынша, бұл мақсаттар жоғары технологиялық салаларды дамытуға, жаңа жұмыс орындарын құруға және жергілікті шикізатты терең өңдеу арқылы бәсекеге қабілеттілікті арттыруға мүмкіндік береді.