Өзбекстанда 2027-жылдан баштап акысыз дары-дармектердин тизмеси кеңейтилет

Өзбекстанда кепилдик берилген медициналык жардам пакети кеңейтилет. Президент Шавкат Мирзиёев 27-октябрда «Көксарой» резиденциясында саламаттык сактоо жана фармацевтика тармагынын кызматкерлери менен өткөн жолугушууда 2027-жылдан баштап акысыз дары-дармектердин саны 73кө, медициналык текшерүүлөрдүн түрлөрү 36га чейин көбөйөрүн билдирди. Азыр поликлиникалар 69 аталыштагы дары-дармекти акысыз берип жатат.

Мамлекет башчысынын айтымында, ашказан, жоон ичеги, простата бези жана өпкө рагын erte аныктоо иштери Самаркандан башталып, 2028-жылдан бардык аймактарда киргизилет. Ага жылына 700 млрд сум бөлүнөт. Андижан, Фергана, Наманган, Самарканд жана Ташкентте ишке ашырылып жаткан инфаркт жана инсультту эрте аныктоо программасынын натыйжасында беш айдын ичинде бул оорулардын эрте баскычтарындагы өлүм көрсөткүчү 15 пайызга төмөндөгөн. 855 адам эрте өлүмдөн жана майыптыктан сакталып калган.

Мирзиёев биринчи буунду реформалоо маселесине да токтолду. Жаңы модель 28 районда сыналып, анда 7 млн адам үй-бүлөлүк дарыгерлерге бекитилген. 2027-жылдан баштап модель дагы 100 районда киргизилет. Акыркы он жылда 10 млн адамга тейлөө көрсөтүүгө арналган жаңы поликлиникалар жана ооруканалар пайдаланууга берилип, 58 миң жаңы ооруканалык орун түзүлгөн.