Oʻzbekistonda 2027 yildan bepul dorilar va tekshiruvlar roʻyxati kengaytiriladi

Oʻzbekistonda kafolatlangan tibbiy yordam paketi kengaytiriladi. Davlat rahbari Shavkat Mirziyoyev 27 oktyabr kuni «Koʻksaroy» qarorgohida sogʻliqni saqlash va farmatsevtika sohasi xodimlari bilan oʻtkazilgan uchrashuvda, 2027 yildan boshlab bepul dori vositalari soni 73 taga, tekshiruv turlari esa 36 tagacha koʻpayishini maʼlum qildi. Bugungi kunda poliklinikalar 69 nomdagi dori vositalarini bepul yetkazib bermoqda.

Davlat rahbarining soʻzlariga koʻra, oshqozon, yoʻgʻon ichak, prostata bezi va oʻpka saratonini erta aniqlash ishlari Samarqanddan boshlanib, 2028 yildan barcha hududlarda joriy etiladi. Bunga yiliga 700 mlrd soʻm ajratiladi. Andijon, Fargʻona, Namangan, Samarqand va Toshkentda amalga oshirilayotgan infarkt va insultni erta aniqlash dasturi natijalariga koʻra, besh oy ichida ushbu kasalliklarning erta bosqichlarida oʻlim koʻrsatkichi 15 foizga kamaygan. Kelgusi yil dasturga 280 mlrd soʻm ajratiladi.

Mirziyoyev, shuningdek, birlamchi boʻgʻinni isloh qilish zarurligini taʼkidladi. Yangi model 28 ta tumanda sinovdan oʻtkazilgan va 7 mln aholi oilaviy shifokorlarga biriktirilgan. 2027 yildan boshlab model yana 100 ta tumanda joriy etiladi. Soʻnggi oʻn yil ichida 10 mln kishiga xizmat koʻrsatishga moʻljallangan yangi poliklinika va shifoxonalar foydalanishga topshirilgan hamda 58 ming yangi shifoxona oʻrni yaratilgan.