Өзбекстанда 2027 жылдан бастап тегін дәрілер мен тексерулер тізімі кеңейеді

Өзбекстанда кепілдендірілген медициналық көмек пакеті кеңейтіледі. Президент Шавкат Мирзиёев 27 қазанда «Көксарай» резиденциясында денсаулық сақтау және фармацевтика саласының қызметкерлерімен өткен кездесуде 2027 жылдан бастап тегін дәрі-дәрмектер саны 73-ке, медициналық тексерулер түрлері 36-ға дейін артатынын мәлімдеді. Қазір емханалар 69 атаудағы дәрі-дәрмекті тегін береді.

Мемлекет басшысының айтуынша, асқазан, жуан ішек, простата безі және өкпе обырын ерте анықтау Самарқанданнан басталып, 2028 жылдан бастап барлық өңірлерде енгізіледі. Бұл үшін жылына 700 млрд сом бөлінеді. Андижан, Ферғана, Наманған, Самарқанд және Ташкентте жүзеге асырылып жатқан инфаркт пен инсультті ерте анықтау бағдарламасының нәтижесінде бес ай ішінде осы аурулардың ерте сатыларындағы өлім көрсеткіші 15 пайызға төмендеген. 855 адам ерте өлім мен мүгедектіктен сақтап қалынған.

Мирзиёев бастапқы буынды реформалау туралы да айтты. Жаңа модель 28 ауданда сынақтан өткен, онда 7 млн адам отбасылық дәрігерлерге бекітілген. 2027 жылдан бастап модель тағы 100 ауданда енгізіледі. Соңғы он жылда 10 млн адамға қызмет көрсетуге арналған жаңа емханалар мен ауруханалар пайдалануға берілген, 58 мың жаңа аурухана орны құрылған.