Казакстан жарандары ТМУ өлкөлөрүнө жеке күбөлүк менен бара алат: Мирзиёев сунушу

Казакстан жарандары Түрк мамлекеттери уюмуна (ТМУ) мүчө өлкөлөргө жеке күбөлүк менен гана сапар чека алышат. Бул демилгени Өзбекстандын президенти Шавкат Мирзиёев Анкарада өткөн ТМУнун 13-саммитинде сунуштады. Egemen.kz маалыматына ылайык, Мирзиёев беш өлкө ортосунда жарандардын өз ара сапарын жеңилдеткен көп тараптуу келишим иштеп чыгууну сунуштады.

Мирзиёевдин сөзүнө караганда, келишимде жеке күбөлүк негизинде сапарлоо мүмкүнчүлүгүн кеңейтүү, чек арадан өтүү жана кабыл алуучу мамлекеттин аймагында болуу тартибин жөнөкөйлөтүү каралышы керек. Демилге Казакстанга, Өзбекстанга, Кыргызстанга, Азербайжанга жана Түркияга тиешелүү. Жаңы тартиптин күчүнө кириши үчүн беш өлкө келишимдин шарттарын бекитип, тиешелүү документке кол коюшу зарыл.

Азыркы учурда Казакстандын жарандары ТМУ мүчөлөрүнүн арасынан Кыргызстанга гана жеке күбөлүк менен бара алат. Түркияга, Өзбекстанга жана Азербайжанга баруу үчүн чет өлкөлүк паспорт талап кылынат. Сентябрда ТМУнун бас катчысы Кубанычбек Өмүралиев беш өлкө ортосунда жеке күбөлүк менен өз ара сапарлоону киргизүү иштери башталганын билдирген. Ал эми Президент Касым-Жомарт Токаев саммитке катышуу үчүн Түркияга расмий сапар менен келип, Анкаранын Этимесгут аэропортунда Президент Режеп Тайып Эрдоган тарабынан тосулган.