Қазақстан азаматтары ТМҰ елдеріне жеке куәлікпен бара алады: Мирзиёев ұсынысы

Қазақстан азаматтары Түркі мемлекеттері ұйымына мүше елдерге тек жеке куәлікпен саяхаттай алуы мүмкін. Бұл бастаманы Өзбекстан президенті Шавкат Мирзиёев Анкарада өткен ТМҰ-ның 13-саммитінде ұсынды. Egemen.kz хабарлауынша, Мирзиёев бес мемлекет арасында азаматтардың өзара сапарын жеңілдететін көпжақты келісім әзірлеуді ұсынды.

Мирзиёевтің айтуынша, келісімде жеке куәлік негізінде сапарлау мүмкіндігін кеңейту, шекарадан өту және қабылдаушы мемлекет аумағында болу тәртібін жеңілдету қарастырылуы керек. Бастама Қазақстанға, Өзбекстанға, Қырғызстанға, Әзербайжанға және Түркияға қатысты. Жаңа тәртіптің күшіне енуі үшін бес ел келісім талаптарын мақұлдап, тиісті құжатқа қол қоюы қажет.

Қазір Қазақстан азаматтары ТМҰ мүше елдері ішінде тек Қырғызстанға жеке куәлікпен бара алады. Түркия, Өзбекстан және Әзербайжанға бару үшін шетелдік паспорт қажет, бірақ бұл елдермен визасыз режим қалыптасқан. Қыркүйекте ТМҰ бас хатшысы Кубанычбек Өмүралиев бес ел арасында жеке куәлікпен сапарлау мүмкіндігін енгізу жұмысы басталғанын хабарлаған еді. Ал Президент Қасым-Жомарт Тоқаев саммитке қатысу үшін Түркияға ресми сапармен барды, оны Анкарадағы Этимесгут әуежайында Президент Режеп Тайып Ердоған қарсы алды.