Бухара мунай кайра иштетүү заводу 328 млн долларга модернизацияланат

Өзбекстандагы Бухара мунай кайра иштетүү заводу 328 млн доллар турган долбоор менен модернизацияланат. Долбоор мамлекет башчысына сунушталды. Kun.uz маалымат бергендей, заводдо быйылкы тогуз айда наркы 12,1 трлн сом болгон 1,36 млн тонна мунай продукциясы өндүрүлгөн. Продукция менен кызматтардын экспорту 99,5 млн долларды түздү. Жыл аягына чейин бул көрсөткүчтү 116 млн долларга жеткирүү пландаштырылган.

Долбоордун максаты – чийки затты кайра иштетүүнүн көлөмүн көбөйтүү жана жогорку октандуу бензин өндүрүү мүмкүнчүлүктөрүн кеңейтүү. Долбоордун алкагында нафта үчүн гидротазалоо жана изомеризация кайрааны орнотулат. Гидротазалоодо чийки заттагы күкүрт жана башка аралашмалар азаят, ал эми изомеризация жеңил фракциялардан алынган бензиндин октан санын көтөрөт. Бул процесстер Евро-5 талаптарына жооп берген AI-92 жана AI-95 бензинин өндүрүү үчүн маанилүү деп белгиленет.

Долбоордо чийки затты фракцияларга бөлүү жана оор калдыктарды терең кайра иштетүү да каралган. Натыйжада заводдун жылдык кайра иштетүү кубаттуулугуна 2,5 млн тонна кошулуп, жалпы кубаттуулук 5 млн тоннага жетет. Президент модернизация иштерин белгиленген мөөнөттө жана жогорку сапатта аткаруу боюнча тапшырмалар берип, долбоорго катышып жаткан чет элдик компаниялардын өкүлдөрү менен жолугушту.