Бұхара мұнай өңдеу зауыты 328 млн долларға жаңғыртылады

Өзбекстандағы Бұхара мұнай өңдеу зауыты 328 млн долларлық жобамен жаңғыртылады. Жоба мемлекет басшысына ұсынылды. Kun.uz хабарлағандай, зауыт осы жылдың тоғыз айында құны 12,1 трлн сом болатын 1,36 млн тонна мұнай өнімдерін өндірді. Өнім мен қызметтердің экспорты 99,5 млн долларды құрады. Жыл соңына дейін бұл көрсеткішті 116 млн долларға жеткізу жоспарланған.

Жобаның мақсаты – шикізатты өңдеу көлемін арттыру және жоғары октанды бензин өндіру мүмкіндіктерін кеңейту. Жоба аясында нафтаға арналған гидротазалау және изомеризация қондырғылары орнатылады. Гидротазалау шикізат құрамындағы күкірт пен басқа қоспаларды азайтады, ал изомеризация жеңіл фракциялардан алынатын бензиннің октан санын арттырады. Бұл процестер Евро-5 талаптарына сай AI-92 және AI-95 бензинін өндіру үшін маңызды деп аталады.

Жобада шикізатты фракцияларға бөлу және ауыр қалдықтарды терең өңдеу де көзделген. Нәтижесінде зауыттың жылдық өңдеу қуатына 2,5 млн тонна қосылып, жалпы қуат 5 млн тоннаға жетеді. Президент модернизация жұмыстарын белгіленген мерзімде және жоғары сапамен орындау жөнінде тапсырмалар берді, сондай-ақ жобаға қатысып жатқан шетелдік компаниялардың өкілдерімен кездесті.