Özbegistanyň döwlet edaralary 43 görnüş maglumaty açmaly

Özbegistanyň döwlet edaralary we guramalary jemgyýet üçin ähmiýetli 43 görnüş maglumaty Açyk maglumatlar portalynda we resmi web sahyfalarynda ýerleşdirmäge borçludyr. Degişli maglumatlaryň sanawy kanunçylykda çap edildi. Habary UzDaily Daşkentden berdi.

Sanawa resmileriň iş syýahatlary we daşary ýurtly myhmanlary kabul etmek çykdajylary, resmi ulaglaryň, öý-jaýlaryň we beýleki emläkleriň ulanylyşy, satyn alyş komissiýalarynyň düzümi we döwlet satyn alyşlary, boş iş orunlary, işe kabul etmegiň şertleri we talaplar girýär. Hajy nobatyny sebitler boýunça, döwlet uniwersitetleriniň girdeji we çykdajylaryny, ýerli býujet serişdeleriniň ulanylyşyny we çagalary döwlet mekdebe çenli bilim guramalaryna kabul etmek üçin arzalaryň tertibini hem görkezmeli. Bu maglumatlaryň wagtynda we hilli ýerleşdirilmegi üçin jemgyýetçilik bilen gatnaşyklar we raýatlaryň arzalary bilen iş alyp barýan bölümler jogapkärdir.

Korrupsiýa garşy göreş agentligi döwlet edaralarynyň açyklygyny üpjün etmek boýunça işi koordinirleýändigini we talaplaryň ýerine ýetirilişini yzygiderli gözegçilikde saklaýandygyny mälim etdi. Korrupsiýa faktlary barada raýatlar 1253 belgisine jaň edip habar berip bilerler.