Өзбекстан мемлекеттік органдары 43 түрлі ақпаратты жариялауы тиіс

Өзбекстанның мемлекеттік органдары мен ұйымдары 43 түрлі қоғамдық маңызы бар ақпаратты Ашық деректер порталында және ресми веб-сайттарында орналастыруы тиіс. Бұл ақпараттың тізбесі заңнамада жарияланған. Хабарды UzDaily Ташкенттен таратты.

Тізімге лауазымды тұлғалардың іссапар және шетелдік қонақтарды қабылдау шығыстары, қызметтік көлікті, тұрғын үйді және басқа жылжымайтын мүлікті пайдалану, сатып алу комиссияларының құрамы және мемлекеттік сатып алулар, бос жұмыс орындары, жұмысқа қабылдау шарттары мен талаптар кіреді. Сондай-ақ хаж кезегі аймақтар бойынша, мемлекеттік жоғары оқу орындарының кірісі мен шығыстары, жергілікті бюджет қаражатын пайдалану және балаларды мемлекеттік мектепке дейінгі білім беру ұйымдарына қабылдау өтініштерінің реттілігі көрсетіледі. Бұл мәліметтерді уақтылы әрі сапалы орналастыруға қоғаммен байланыс және азаматтардың өтініштерімен жұмыс істейтін бөлімшелер жауапты.

Сыбайлас жемқорлыққа қарсы агенттік мемлекеттік органдардың ашықтығын қамтамасыз ету жұмысын үйлестіретінін және талаптардың сақталуын тұрақты түрде бақылайтынын хабарлады. Сыбайлас жемқорлық фактілері туралы азаматтар 1253 телефон нөмірі арқылы хабарлай алады.