Өзбекстандын мамлекеттик органдары 43 түрдөгү маалыматты ачышы керек

Өзбекстандын мамлекеттик органдары жана уюмдары коомдук маанилүү 43 түрдөгү маалыматты Ачык маалыматтар порталында жана расмий сайттарында жайгаштырууга милдеттүү. Мындай маалыматтардын тизмеси мыйзамдарда жарыяланган. Кабарды UzDaily Ташкенттен таратты.

Тизмеге кызмат адамдарынын иш сапарлары жана чет элдик конокторду кабыл алуу чыгымдары, кызматтык транспортту, турак жайды жана башка кыймылсыз мүлктү пайдалануу, сатып алуу комиссияларынын курамы жана мамлекеттик сатып алуулар, бош жумуш орундары, жумушка алуу шарттары жана талаптар кирет. Ошондой эле хажга кезек аймактар боюнча, мамлекеттик жогорку окуу жайлардын киреше жана чыгымдары, жергиликтүү бюджет каражаттарын пайдалануу жана балдарды мамлекеттик мектепке чейинки билим берүү уюмдарына кабыл алуу арыздарынын тартиби көрсөтүлөт. Бул маалыматтарды өз убагында жана сапаттуу жайгаштырууга коомдук байланыш жана жарандардын кайрылуулары менен иштеген бөлүмдөр жооп берет.

Коррупцияга каршы агенттик мамлекеттик органдардын ачыктыгын камсыз кылуу боюнча иште координация кылып жатканын жана талаптардын сакталышын туруктуу түрдө көзөмөлдөп турганын билдирди. Коррупция фактылары тууралуу жарандар 1253 телефон номери аркылуу кабар бере алышат.